ရန်ကုန်ဖွံ့ဖြိုးရေး ပြင်သစ်ချေးငွေ ယူရိုသန်း ၇၀ ကိစ္စ ပြည်ထောင်စုလွှတ်တော် ဆိုင်းငံ့

{DVB TV News မှာ ဖော်ပြထားသည်များကို ပြန်လည်ဝေမျှခြင်းဖြစ်ပါသည်။ မူရင်းသတင်းစာမျက်နှာသို့ သွားရောက်ကြည့်ရှုလိုပါက ဒီနေရာကို ကလစ်ပေးပါ။} 

ငမိုးရိပ်ချောင်းနဲ့ ရန်ကုန်မြစ်မျက်နှာစာ ဖွံ့ဖြိုးရေးနဲ့ ထိန်းသိမ်းရေးအတွက် ပြင်သစ်နိုင်ငံဆီ ကနေ ယူရိုငွေ သန်း ၇၀ ချေးယူဖို့ ကိစ္စကို ပြည်ထောင်စုလွှတ်တော်က ခေတ္တဆိုင်းငံ့လိုက်ပါတယ်။

ချေးငွေနဲ့ ပတ်သက်ပြီး အတည်ပြုချက်ရယူနိုင်ဖို့ နိုဝင်ဘာ ၂၆ ရက် မနက် ပြည်ထောင်စုလွှတ်တော်မှာ စီမံကိန်းနှင့် ဘဏ္ဍာရေး ပြည်ထောင်စုဒုဝန်ကြီး ဦးမောင်မောင်ဝင်းက ရှင်းလင်းတင်ပြအပြီးမှာ လွှတ်တော်နာယကက သုံးသပ်စရာတွေရှိသေးလို့ ချေးငွေကိစ္စ ဆိုင်းငံ့တယ်လို့ ပြောပါတယ်။

ပြည်ထောင်စုလွှတ်တော်နာယက ဦးတီခွန်မြတ်က “အထက်ပါပြင်သစ်ဖွံ့ဖြိုးတိုးတက်ရေး အေဂျင်စီထံမှ ချေးငွေယူရိုသန်း ၇၀ ရယူရန်ကိစ္စနဲ့စပ်လျဉ်းပြီး မိမိတို့ လွှတ်တော် အပိုင်းအနေနဲ့ ထပ်မံစိစစ်လေ့လာဖို့လိုမယ်လို့ သုံးသပ် ရရှိပါတယ်။ ဒါ့ကြောင့် လွှတ်တော်ရဲ့ အဆုံးအဖြတ်ရယူခြင်းကို ခေတ္တ ဆိုင်းငံ့ထားမှာဖြစ်ပါတယ်” လို့ ပြောပါတယ်။

ပြည်သူ့ငွေစာရင်းပူးပေါင်းကော်မတီက ချေးငွေကိစ္စကို သက်ဆိုင်ရာဌာနနဲ့ ပြန်လည်ညှိနှိုင်းဆွေးနွေးပြီး တွေ့ရှိချက်ကို ဒီဇင်ဘာ ၃ ရက်ထက် နောက်မကျစေဘဲ ပြည်ထောင်စု လွှတ်တော်ထံ တင်ပြဖို့ နာယကက လမ်းညွှန်ပါတယ်။

ငမိုးရိပ်ချောင်းနဲ့ ရန်ကုန်မြစ်မျက်နှာစာ ဖွံ့ဖြိုးရေးနဲ့ ထိန်းသိမ်းရေးအတွက် ပြင်သစ်နိုင်ငံကနေ ယူရိုငွေ သန်း ၇၀ ချေးယူဖို့ ကိစ္စကို နိုဝင်ဘာ ၁၂ရက်မှာ စီမံဘဏ္ဍာဒုဝန်ကြီးက ပြည်ထောင်စု လွှတ်တော်မှာတင်သွင်းခဲ့ပါတယ်။

ဒီကိစ္စ နိုဝင်ဘာ ၁၉ ရက်မှာ လွှတ်တော်ကိုယ်စားလှယ် ၉ ဦး ဝင်ရောက်ဆွေးနွေးခဲ့ရာမှာ အန်အယ်လ်ဒီအမတ်တွေအပါအဝင် လွှတ်တော် ကိုယ်စားလှယ် ၆ဦးက ကန့်ကွက်ဆွေး နွေးခဲ့ကြပါတယ်။

ဒီချေးငွေတွေနဲ့ ငမိုးရိပ်ချောင်းအတွင်း ရေစီးရေလာ ပိုမိုကောင်းမွန်စေဖို့၊ ကမ်းပါးထိန်းသိမ်းဖို့၊ ကမ်းပတ်စင်္ကြံလမ်းတွေနဲ့ အပန်းဖြေနေရာသစ်တွေ ပေါ်ထွန်းလာဖို့၊ ငမိုးရိပ်(မလွှကုန်း) ဘူတာပတ်ဝန်းကျင်ကားလမ်း၊ ရထားလမ်းနဲ့ ရေကြောင်းလမ်းချိတ်ဆက် ဆောင်ရွက်တာ၊ ပုဇွန်တောင်စျေး အဆင့်မြှင့်တင်တာ၊ ဆိပ်ကမ်းသာ၊ လမ်းမတော်နဲ့၊ ကြည့်မြင်တိုင်ပန်းခြံ အဆင့်မြှင့်တင်မယ့် စီမံကိန်းတွေ ဆောင်ရွက်မယ်လို့ အစိုးရက ရှင်းပြပါတယ်။

စီမံကိန်းကို ရန်ကုန်မြို့တော်စည်ပင်သာယာရေးကော်မတီက ဆောင်ရွက်သွားမှာ ဖြစ်ပြီး စီမံကိန်းဖြစ်မြောက်နိုင် စွမ်းလေ့လာဆန်းစစ်မှုကို ၂၀၁၇ ခုနှစ် ဇန်နဝါရီလက စတင်ခဲ့တာ ၂၀၁၈ ခုနှစ် ဖေဖော်ဝါရီလမှာ အပြီးသတ်ခဲ့ တယ်လို့ သိရပါတယ်။ စီမံကိန်းကာလမှာ ၂၀၁၉ ခုနှစ်ကနေ ၂၀၂၃ ခုနှစ်ထိ ၅ နှစ်ဖြစ်ပါတယ်။

ချေးငွေအဖြစ် ပြင်သစ်ဖွံ့ဖြိုးတိုးတက်ရေးအေဂျင်စီ (AFD) ဆီက ယူရိုသန်း ၇၀ အပြင် ဥရောပသမဂ္ဂ (အီးယူ) က ထောက်ပံ့ငွေ ယူရို ၉ ဒသမ ၅ သန်း၊ အခွန်အခတွေ၊ မြေယာအသုံးချမှုနဲ့ ရွှေ့ပြောင်းမှုကိစ္စတွေအတွက် အစိုးရက ယူရို ၅ ဒသမ ၂ သန်း စုစုပေါင်း ယူရို ၈၄ ဒသမ ၇ သန်းနဲ့ စီမံကိန်းတွေကို ဆောင်ရွက်သွားမှာ ဖြစ်ပါတယ်။

ချေးငွေမှာ ဆိုင်းငံ့ကာလ ၇ နှစ်၊ ပြန်ဆပ်ကာလ ၁၈ နှစ်၊ စုစုပေါင်း ၂၅ နှစ်နဲ့ အတိုးနှုန်းမှာ ဥရောပသမဂ္ဂဘဏ် အချင်းချင်း ၆ လ ချေးငွေအပေါ်ယူတဲ့ အတိုးနှုန်း သုည ဒသမ ၄ ရာခိုင်နှုန်းဖြစ် ပါတယ်။

26 November 2018