အခွန်ရှောင်သည့် ကုမ္ပဏီကြီးများကို စုံစမ်းစစ်ဆေး ဖော်ထုတ်ရန် လွှတ်တော်အကြံပြု

{DVB TV News မှာ ဖော်ပြထားသည်များကို ပြန်လည်ဝေမျှခြင်းဖြစ်ပါသည်။ မူရင်းသတင်းစာမျက်နှာသို့ သွားရောက်ကြည့်ရှုလိုပါက ဒီနေရာကို ကလစ်ပေးပါ။} 

အခွန်ရှောင်တာနဲ့ လျော့ပေါ့ပေးဆောင်တာတွေကို ဖော်ထုတ်နိုင်ဖို့ ကုမ္ပဏီကြီးတွေကို ပြည်ထောင်စုစာရင်းစစ်ချုပ်အနေနဲ့ စစ်ဆေးသင့်တယ်လို့ ပြည်ထောင်စုလွှတ်တော်က အကြံပြုလိုက်ပါတယ်။

အခွန်ကောက်ခံတာမှာ အခွန်တိမ်းရှောင်နေသူတွေနဲ့ အခွန်လျော့ပေါ့ ပေးဆောင်နေသူတွေကို စုံစမ်းဖော်ထုတ်ပြီး ထိရောက်စွာ ကောက်ခံနိုင်အောင် စီမံဆောင်ရွက်သွားဖို့ ပြည်ထောင်စုလွှတ်တော် ပြည်သူ့ငွေစာရင်း ပူးပေါင်းကော်မတီက အကြံပြု တင်ပြလိုက်တာပါ။

နိုဝင်ဘာ ၂၆ ရက် ပြည်ထောင်စုလွှတ်တော် အစည်းအဝေးမှာ ၂၀၁၇-၁၈ ဘဏ္ဍာရေးနှစ် ပြည်ထောင်စုဝန်ကြီးဌာန၊ အဖွဲ့အစည်းတွေရဲ့ ဒုတိယ ၆ လပတ် အခွန်ရငွေစာရင်းတွေအပေါ် လေ့လာတွေ့ရှိချက်နဲ့ သဘောထားမှတ်ချက် အစီရင်ခံစာကို ပြည်သူ့ငွေစာရင်း ပူးပေါင်းကော်မတီ အဖွဲ့ဝင် ဦးဘိုကြီးက တင်ပြ အကြံပြုလိုက်တာပါ။

ကုမ္ပဏီတွေရဲ့ အရှုံးအမြတ်စာရင်းတွေကို မြန်မာနိုင်ငံ စာရင်းအင်းကောင်စီ အသိအမှတ်ပြု ပြင်ပစာရင်းစစ်အဖွဲ့က စစ်ဆေး၊ ထောက်ခံထားတဲ့ နှစ်ချုပ်စာရင်းကို ကုမ္ပဏီရဲ့ ပိုင်ရှင်ဖြစ်စေ၊ ဒါရိုက်တာအဖွဲ့ကဖြစ်စေ ပြည်တွင်းအခွန်ဦးစီးဌာနကို ပေးပို့ရပြီး အခွန်ဦးစီးဌာနက ထပ်မံစိစစ်ပြီး သတ်မှတ်ထားတဲ့ ဝင်ငွေခွန်ရာခိုင်နှုန်းတွေ၊ ကုန်သွယ်လုပ်ငန်းခွန်တွေ တွက်ချက်ရတာဖြစ်တယ်လို့ ဆိုပါတယ်။

ပြည်ထောင်စုစာရင်းစစ်ချုပ်ဥပဒေမှာ ပြင်ပအဖွဲ့တွေ စစ်တာတင်မကဘဲ လိုအပ်ရင် စာရင်းစစ်ချုပ်အနေနဲ့ ထပ်မံစစ်ဆေးနိုင်တယ်လို့ ထပ်မံဖြည့်စွက်ထားတာကြောင့် ကုမ္ပဏီကြီးတွေကို ထပ်မံစစ်ဆေးသင့်တယ်လို့ ဦးဘိုကြီးက ပြောပါတယ်။

“စာရင်းစစ်တဲ့ ပြင်ပစာရင်းစစ်တွေက ဒီကိန်းဂဏန်းတွေ မှန်ဖို့၊ စစ်ဖို့ အရေးကြီးသလို ပြည်တွင်းအခွန်ဌာနက အခွန်ဝန်ထမ်းတွေကလည်း တိတိကျကျစစ်မှသာ မှန်ကန်တဲ့အခွန်တွေ ရမှာဖြစ်တယ်။ ဒါပေမယ့် ၂၀၁၈ ခုနှစ် ပြည်ထောင်စုလွှတ်တော်မှာ ပြည်ထောင်စု စာရင်းစစ်ချုပ်ဥပဒေကို ထပ်မံဖြည့်စွက်ပြီး အတော်လေး အကြိတ်အနယ် ပြဋ္ဌာန်းခဲ့ရပါတယ်။ ဘာပါလာလဲဆိုရင် ပြင်ပစာရင်းစစ်အဖွဲ့က စစ်တာတင် မကဘဲနဲ့ လိုအပ်ပါက ပြည်ထောင်စု စာရင်းစစ်ချုပ်အနေနဲ့ အခါအားလျော်စွာ စိစစ်ပြီး တင်ပြမယ်ဆိုတာ ပါလာပါတယ်။ အခုလာမယ့် ၂၀၁၇-၂၀၁၈ ပြည်ထောင်စုစာရင်းစစ်ချုပ် အစီရင်ခံစာမှာ ပြည်သူတွေလည်း ပိုမိုပြီးတော့ သဘောပေါက် နားလည်လာအောင်၊ တကယ် အခွန်လည်း မှန်မှန်ကန်ကန်ရအောင် ပြည်ထောင်စုစာရင်းချုပ်ရဲ့ အစီရင်ခံစာမှာ အနည်းဆုံး ကုမ္ပဏီကြီးတွေပေါ့ ၅ ခုလောက်ကို ထပ်မံစစ်ဆေးပြီးတော့ အစီရင်ခံစာ တင်သင့်ပါတယ်လို့ အကြံပြု တင်ပြပါတယ်။”

အခုလို စစ်ဆေးလိုက်ရင် အခွန်တိမ်းရှောင်တာ၊ လျှော့ပေါ့ပေးဆောင်တာတွေ လျော့နည်းလာပြီး အစိုးရအနေနဲ့ အခွန်တွေ ပိုရလာမယ်လို့ ပြောပါတယ်။ အခွန်ရှောင်တာတွေ၊ မဆောင်တာတွေ တိုင်းပြည်မှာ အများကြီး ရှိနေသေးတာကြောင့် ဒဏ်ပေးစနစ်ကိုလည်း ကျင့်သုံးသင့်တယ်လို့ ပုလဲမဲဆန္ဒနယ်က ဒေါ်ခင်စန်းလှိုင်က ပြောပါတယ်။

“အခွန်များများဆောင်တဲ့သူတွေကို အခွန်ထမ်းကြီးစာရင်းမှာ ထည့်ပေးမယ်၊ ဂုဏ်ပြုပေးမယ်၊ ဆုတွေပေးမယ် ဆိုတာထက် ဒီလို အခွန်မဆောင်ရင် ဘယ်လိုဖြစ်မလဲဆိုတဲ့ အဓိကကျတဲ့ ဒဏ်ပေးတဲ့စနစ်မျိုး ဟိုးအရင်တုန်းကဆိုလို့ရှိရင်လည်း အခွန်မဆောင် အခွန်ရှောင်တဲ့သူတွေကို အရေးယူတာတွေ အပြစ်ပေးတာတွေ အများကြီးပဲလေ။ အခုကျ ဒီဘက်နောက်ပိုင်းမှာ ဒီစနစ်က ပျောက်ကွယ်သွားတာဆိုတော့ ပြောချင်တာကတော့ ဘာကြောင့် အခွန်ရှောင်သလဲ၊ ဘာကြောင့် အခွန်ပြည့်မီအောင် မဆောင်သလဲ ဒါလေးကတော့ သေချာဖော်ထုတ်ရမယ်။ ဒီအတွက် လိုအပ်ရင် ဥပဒေတွေပြဋ္ဌာန်းဖို့နဲ့ ရှိပြီးသားဥပဒေတွေကလည်း ထိထိရောက်ရောက် အရေးယူနိုင်ဖို့ရာ အတွက်လည်း ဆောင်ရွက်ရမှာဖြစ်တယ်။”

၂၀၁၇-၁၈ ဘဏ္ဍာနှစ် အခွန်ရငွေစာရင်းတွေအရ ၂၀၁၇ ခုနှစ် ပြည်ထောင်စုရဲ့ အခွန်အကောက်ဥပဒေပါ အခွန် ၂၁ မျိုးအနက် ၁၀ မျိုးပဲ လျာထားချက်ကျော်အောင် ကောက်နိုင်ခဲ့ပြီး ကျန် ၁၁ မျိုးမှာ လျာထားချက်ပြည့်မီခြင်း မရှိဘူးလို့ ပြည်သူ့ငွေစာရင်း ပူးပေါင်းကော်မတီက အစီရင်ခံထားပါတယ်။

လျာထားချက်မပြည့်တဲ့ ၁၁ မျိုးအနက် ၇ မျိုးမှာ ဒုတိယ ၆ လပတ် ရည်မှန်းချက်ကို မပြည့်မီပေမယ့် တနှစ်လုံး ရည်မှန်းချက်ကို ပြည့်မီ ကျော်လွန်ခဲ့တယ်လို့ ဆိုပါတယ်။

ကုန်သွယ်လုပ်ငန်းခွန်၊ တံဆိပ်ခေါင်းခွန်၊ ဝင်ငွေခွန်၊ ရေနံနဲ့ သဘာဝဓာတ်ငွေ့အတွက် ကောက်ခံတဲ့ အခွန် ၄ မျိုးမှာ ဒုတိယ ၆ လပတ် ရည်မှန်းချက်ကို ပြည့်မီခြင်းမရှိသလို တနှစ်ပတ်လုံး ရည်မှန်းချက်ကိုပါ ပြည့်မီခြင်း မရှိဘူးလို့ သိရပါတယ်။

27 November 2018